世衛(WHO)建議BB應全人奶餵哺至六個月大，第一胎生言妹妹時，自以為做足準備，結果卻是個「窮媽」，非常挫敗同無助... 第二次當「人奶媽」，避開走過的冤枉路，不單可以全人奶，而且餵奶人生亦輕鬆得多！

起跑線很重要

妹妹一出世，醫護人員就將佢放喺我身上skin to skin，去到產後房就有母乳姑娘協助，所以生完一個鐘內妹妹已經開始埋身食奶。

除左醫院嘅配合，想快D上奶一定要密密埋身、學識用手擠奶、餵奶擠奶前先按摩胸部。頭幾日唔好靠上奶湯，等上奶穩定後先飲上奶湯增加奶量。

今胎 Day 1 已經手擠到少少「黃金初乳」俾妹妹喇～ 初乳每一滴都營養豐富，用針筒收集就唔會浪費！再擠到多少少，可以改用杯儲奶，再用針筒喺BB嘴角「吱」入口。

到 Day 2 開始進入樽頸位... 下晝連續兩個幾鐘不斷埋身，妹妹依然追住要奶，搞到我就快變人乾 ;_; 終於捱到夜晚催乳師黎打救我！產後72小時內係「黃金開奶期」，催乳師黎到用左一個鐘幫我按通哂所有乳腺，通左之後完全無哂D粒粒，之後妹妹再埋身感覺已經完全唔同，一邊餵一邊feel到兩邊一齊出奶而且好暢順！

催乳師每次都會紀錄低媽媽乳房嘅狀況

到 Day 3 出院，開始好澎湃咁上奶，就連續幾日搵催乳師上門按，等上奶情況更穩定同埋逐漸增加奶量。除左按胸，佢仲會視乎情況按摩穴位幫助通乳發乳，又會睇埋我餵阿B嘅姿勢而作出指導。雖然上胎已經有8個月餵奶經驗，但原來好多野我以前都做得唔啱!!! 催乳師亦有教埋我遇上塞奶時嘅應急方法，同埋用唔同嘅餵奶姿態處理塞奶嘅問題，真係長~知~識~

Day 4 已經泵到約30ml黃金初乳喇！

到 Day 5 阿B返健康院檢查，黃疸已經退得7788，體重回升亦好理想，證明奶量夠阿B食飽飽，即刻放心哂！

頭幾日真係keep住每兩三個鐘就餵一次，最長一覺都係訓得三個鐘... 但捱得呢幾日就轉入直路，Week 2 時每泵嘅奶量大概夠阿B食兩餐，可以儲起D冰奶做儲備！

切勿over-feed

BB剛出世，胃仔其實非常細！所以頭幾日，盡量唔好用奶樽，因為bottle feed好容易餵過量，會撐大BB個胃亦增加嘔奶機會。嘔奶除左阿B辛苦、清潔麻煩，又唔知佢嘔左幾多要食番幾多...

而對於母乳媽媽，因為一般第3-5日先上奶，如果頭幾日BB食量太大，追奶就更難！

每個媽媽都會驚BB餓親，我都唔例外。妹妹Week 2-3 都係飲緊50ml，聽到好多同期BB已經飲緊成倍，做阿媽都好擔心呢個細size BB食太少... 但滿月時妹妹重左剛好1kg 好理想，而且咁耐只係嘔過一次奶咋！

增加奶量要訣

人奶媽要比一般人吸收更多水份以造奶，所以餵奶前後我都會飲炒米茶/助乳茶/湯水。而奶量其實係供求關係，需求越大(次數與份量)，身體造奶就越多，當然前題係夠水份而乳腺又ready好。

當上奶穩定後，我一邊埋身另一邊用「接奶神器」泵奶，效果就好似一對Twins同時啜緊兩邊，咁身體就會接收到奶量需要好大而加把勁造奶，仲慳返泵奶嘅時間，所以真係輕鬆好多！

用「接奶神器」輕鬆滴出母乳

當BB嘅猛長期黎到，亦係增奶嘅時機，雖然係辛苦d都要密密餵或者再加泵，咁奶量亦會慢慢追上。上胎亦有用過Power pumping嘅方法追奶，效果唔錯但係堅係好攰呢...