自問自己真係一隻牛魔王，對牛情有獨鍾！近年改變咗煎牛扒嘅做法，用仿熟成嘅模式去試試，出來效果又覺得唔錯喎。人總想進步，因為一向喜歡食比較生medium rare，但每次煎完出來即刻急不及待切嚟食，所以隻碟一定好似血流成河咁，好肉酸！不過而家唔會㗎喇，切開都好靚仔，好滿意！
自從上兩年知道dry aged beef（乾式熟成牛肉） 嘅處理過程（意思係將牛肉喺指定溫度嘅地方吊起風乾幾個禮拜），熟成處理過程當然有一定嘅技術，目的係將牛肉嘅肉汁濃縮，濃縮之後牛肉味就自然會更加重，更加突出。 所以膽粗粗咁用呢個原理，响屋企試下自己做！哈哈效果唔錯幾滿意！
做法好簡單：
1. 將牛扒用毛巾印乾淨，用蒸隔晾起，放入雪櫃雪兩日，原理係利用雪櫃嘅低溫同風扇位仿效風乾，集中牛扒肉味！
2. 兩日後拎出牛扒，放於室溫約20－30分鐘，就可以煎了。如果厚1吋多啲嘅牛扒，我會用大火煎封4邊大約10幾20秒，然後再次重複做多一次！之後用錫紙包住等5分鐘左右先至開始切開。
小提示：原來啱啱煎好嘅牛扒一切會滲出大量血水，令到肉質收緊, 所以要等牛扒＂休息＂一陣，等肉質放鬆返，血水被自己肉質纖維吸收返之後，就唔會一切開就血淋淋啦！
閱讀更多Swank's Blog：http://bit.ly/2nlDDJm
