Facebook 有一样好处，就系会提醒你当年今日发生过咩事！旧年4月好梳肝咁去左法国半个月，巴黎就唔洗多讲，仲有从未去过慨北部圣米歇尔山、摩纳哥、南部尼斯、同一个响附近，中文名叫滨海自由城（法文名：Villefranche-sur-Mer）慨地方，一个我觉得几偏门但又值得去慨地点！

同尼斯相比之下，佢冇一个又长又大慨无尽海岸，只系一个小小海湾！泊岸有小游艇，但系个人反而感受到渠慨悠闲，实在好喜欢！由于车站喺山腰，一到站行出去，已经可以响半山望到山下风景，当时我眼中只有​​海边慨餐厅！

之后沿着山，一边睇风景，一边行落山，大约1个钟就到咗我要Hea慨地方喇！行左咁耐，拿拿声坐低食吓嘢先！本身拣左海边其中一间超有feel餐厅，但可惜冇生蚝。咁唯有作出取舍，坐喺对面欣赏到手风琴表演慨位置，食完先再过去海边坐吓！不过边听音乐边食海鲜都几爽吖！

除左生蚝系每日必点item之外，久唔久都会再叫其他唔同类型海鲜试吓！今日我指住海鲜区话想要蚬，大只嗰款！可能人有错手慨关系，当盘生蚝一到，系就系见到上边有蚬，不过唔系大蚬，只系类似港式豉椒炒蚬嗰款慨细蚬咋喎。再睇真啲，系喇冇错！唔知仲以为自己去咗掘蚬，之后即食刺身呀！好笑之余心里面都有暗暗闹爆渠，不过算啦！既然都开咗，费事换过又可能会浪费，咁不如食咗渠！就喺扁晒嘴慨情况下放入口之际，原来蚬不可貌相，对唔住系我错！虽然蚬仔细细，但鲜味直涌而上，肉质爽口，我所有味蕾都比鲜甜味覆盖住呀！即刻觉得连Cherry stone都要行埋一边，最后忍唔住再Encore多一盘！