咳呢家嘢聽到都驚驚，好辛苦！喉嚨氣管一齊痕，完全控制唔到自己不斷狂咳，每次都咳到個肺甩咗出嚟！雖然睇完醫生好返8、9成，但都總係拖住條尾。西藥真係超燥，又令人口淡淡！不過自小屋企有幾款糖水，針對餘下嘅兩聲咳特別有效！我每次都無需要繼續食藥，如果仲有小小未斷尾，就係靠其中一款糖水【杏汁燉花膠】滋潤下條氣管，就會好快好返㗎啦！
呢個糖水對於我簡直萬試萬靈！長大後就十分好奇，所以翻查一下爸爸嘅中醫書！原來杏仁(南北杏)有降氣行氮、除風散寒、治咳嗽、風寒犯肺、肺氣不利而久咳、平喘促、潤燥通腸之功效。據醫書所說龍皇杏即是南杏，又名甜杏仁，比北杏大；北杏雖然帶苦澀，但效力比南杏較強，通常都會以北杏入藥。兩者都含有豐富蛋白質、植物脂肪杏仁油，對滋潤氣管、乾燥皮膚都好有幫助！
睇完之後完全明白晒，豐富嘅杏仁油再加上滋陰花膠，食完除左止咳之外，皮膚都變得光澤透亮啦！
【杏汁燉花膠】食譜
材料：
龍皇杏（南杏）5両（洗乾淨浸過夜，水留起備用）
北杏1両（洗乾淨浸過夜，水留起備用)
(以上水份約共700－800ml）
浸發好的花膠適量
冰糖按個人喜好
做法：
1. 將2種杏仁加水用攪拌器打爛，如果攪拌器没有隔渣功能，可以用魚湯袋隔渣！用手出力將杏仁汁揸出。
2. 重複將杏仁汁同渣攪拌2－3次，再用手用力揸出汁液。
3. 最後用密筲箕隔一次以免有杏仁碎影響口感。之後用中火加入冰糖放入花膠煮熱，然後放入燉盅燉30-45分鐘即可！
小貼士：如果覺得燉花膠繁複，建議煮滚杏仁茶後加入蛋白同煮，一樣滋味養生。
如果想了解更多簡易烹飪食譜，請大家到 慢活、教煮 瀏覽！
閱讀更多Swank's Blog：http://bit.ly/2nlDDJm
