早前去咗英國，因為時差關係再加上一日有4季變化嘅天氣，令我覺得沾寒沾凍身體虛弱！第二日全天侯攰到死下死下咁渡過。

本身帶咗幾包黑糖薑母茶過去比親友做手信，後來有一包剩低，所以十幾日向英國嘅日子，全靠一杯黑糖薑母茶救返我，助我保暖提神！慢慢發現早上起身再無手腳冰冷沒精打彩嘅情況發生。

記得爸爸嘅中藥書籍曾經就有提到生薑既可暖身而且可促進血液循環，活化所有內臟的機能、驅風、活血等等！而黑糖具有補中益氣、健脾暖胃功能、行血、活血散寒效用！可能係兩者兼備功效加倍關係，覺得面色無咁青白之餘就連膚色都均勻咗，暗啞黃氣無哂，雀斑都有微微減淡！返香港後我決定自制生薑黑糖，用一茶匙加入細杯滾水中，久不久朝早起身配合早餐飮用，自己打一來新鮮，二來糖同薑比例可以自行調配，三來連纖維一齊食更覺健康！前前後後食咗一個月，覺得面色紅潤、身體機能改善咗唔少，大家不妨一試！但要注意如果有發燒、喉嚨痛、燥咳等症狀就要暫停服用啦。

《自製生薑黑糖茶》

做法：

老薑洗淨去皮，加入自己喜好的黑糖粉份量放入攪拌器打爛變蓉或打粒，打好的薑汁黑糖倒入密封樽儲存便可。

建議每次打足夠兩至三星期食用份量，放入雪櫃方便需要時使用！

＊小貼士：除左早上飲用之外，仲可以用來煮湯圓、番薯糖水等等，而且剩下薑皮仍有驅風作用，可以廢物利用。一大碗熱水煲薑皮幾分鐘後隔渣，再等待和暖。洗完頭之後用薑皮水淋頭再按一陣，對遇寒引起嘅頭痛有一定幫助。

如果想了解更多簡易烹飪食譜，請大家到 慢活、教煮 瀏覽！

Facebook：慢活、教煮

閱讀更多Swank's Blog：http://bit.ly/2nlDDJm