媽媽由細到大嘅農曆新年，都要去各大親友家拜年，今年亦都唔例外。有D親友，幾年都唔會見一次半次，唔知係咪少見嘅原故，佢地對您嘅大事小事都顯得特別「關心」，而我就特別怕遇到以下呢類親友！

1.亂說話的人

親友甲： 「做乜唔叫人呀？唔叫人係無禮貌呀！您唔乖呀！唔乖嘅小朋友，無人愛啊！」

親友乙：「下，呢件係您新年新衫呀？邊個買比您架？咁肉酸嘅！」

親友丙：「您爸媽寧願同阿邊個邊個應酬，都唔得閒理您啦！」

～嘢可以亂食，說話唔可以亂講呀！一年唔見您幾次，就講埋呢ｄ說話！請唔好忽略我小朋友嘅感受～

2.愛比較的人

親友甲：「阿邊個個仔定個女，十個月大時識行啦！（嘩！）您個小朋友連爬都未識呀？會唔會有問題呀？」

親友乙：「仲有阿邊個個老公，今年升職加薪，做佢老婆真係幸福囉！」

親友丙：「喂，您今年考第幾呀？下，阿戊年年都考頭三名喎，您比Ｄ心機啦！」

～人比人比死人啊！難道您阿爸又係李家Ｘ咩？～

3.零衛生的人

親友甲好似當人地屋企好似係鋪頭咁，見嘢就摸，摸完手都唔抹就想摸或餵小朋友食嘢！

食完賀年食品嘅親友乙，咀又未抹，又徒手撩牙，之後更想哄埋小朋友塊面度表示愛意！（喂！媽媽表示受不了啊！）

～媽唔係懶緊張，而係個人衛生係基本常識啊～

4.假關心的人

親友甲：「您人又靚，條件咁好，做乜無拖拍呀？係咪您眼角高咋？」

親友乙：「您地仲逗利是呀？下年好派啦！其實您兩個打算幾時結婚啫？有計劃未呀？唔好拖咁耐囉？」

親友丙：「哎呀，您地年紀都唔細啦，幾時生返個ｂｂ玩呀？有ｂｂ先熱鬧，先似返個家呀？？？」

親友丁：「幾時生多個呀？唔生？？？個仔／女好孤獨／好悶喎！」

～您嘅人生就好似係佢嘅事～

5.扮專家的人

親友甲乙丙丁ｘＮ：「我話比您知，湊小朋友唔係咁湊／沖奶粉唔係咁沖／小朋友唔係咁教／小朋友要打下先聽話呀…我以前咁咁咁湊，都湊到佢地大啦… 然後，下刪１００萬字！！！」

～每個小朋友都係獨一無二，只有父母先係最了解自己嘅小朋友，請別管我嘅管教方式～

6.亂比嘢的人

請唔好亂比嘢比我小朋友食呀！雖然未必真係比咗小朋友食落肚，即使係玩下，其實唔多唔小都破壞緊我地嘅教養方式。（特別係明知小朋友唔應食太多糖果、汽水呀，有Ｄ親戚就係鍾意同父母唱反調，偷偷地比小朋友吃喝！）

～請唔好亂比嘢比我小朋友食呀！請唔好亂比嘢比我小朋友食呀！請唔好亂比嘢比我小朋友食呀！～

以上大部份都係我真實遇過嘅情況，雖然我知道有些親友未必有心講呢Ｄ說話／做呢Ｄ行為，可能只係出於佢地表達愛／關心嘅方式。但人生在世，大家可以聽完就算，唔洗太過在意嘅（因為認真便輸了！）。或者簡單回應一句：恭喜～我真係恭喜您啊！（註：當然如果某Ｄ位家長認為會對小朋友造成影響嘅，亦可以用一個婉轉嘅方式去制止，別害怕難堪啊！）

哈哈～藉此我們一家都預祝大家新年快樂、身體健康啊！

*********************************

(以上資料更新至撰文當日) 

Alfred媽媽

分享Alfred的成長軼事、幼兒食譜、親子玩樂、購物情報、旅遊資訊、好物介紹等。 以及，Alfred媽作為母親的體會、學習與得著。

Facebook Page：https://www.facebook.com/AllAboutAlfred/

Instagram: https://www.instagram.com/AllAboutAlfred/

更多Alfred媽媽的Blog：https://goo.gl/7HdVtS