《幼兒「看門口」必備藥物list》by 雪梨媽媽-DayDayCook

小朋友唔舒服，父母真係寧願自己病，帶佢去診所或醫院又驚佢再惹到其他病！

幸好認識一班媽媽，經常互share正野可以幫到小朋友，今次等雪梨媽媽介紹下我有咩藥品看門口啦！

傷風感冒篇

(1) 預防保健性，增強抵抗力－接骨木汁 (1歲以上適用)

近年無論大人定細路都多左用接骨木產品預防傷風感冒，有D媽媽仲會每日俾小朋友飲作保健，呢隻好甜，可以當利賓納開水飲。

(2) 流鼻水/鼻塞－嬰兒用洗鼻鹽水 (6個月以上適用) + 雙管吸鼻器

通常BB流鼻水/鼻塞，醫生都係開鹽水，勤力洗鼻就會好快好。不過吸鼻是痛苦的... 所以要出動吸鼻孖寶！呢隻mini spray可以襯佢唔覺噴，然後雙管吸鼻器就唔怕媽媽「奶野」啦（你懂的）

(3) 舒緩、通鼻塞－嬰兒薄荷膏 (3個月以上適用)

初生好多藥都唔建議用，呢隻Babyrub比較溫和，BB訓得唔好，呼吸聲大，有病嘅跡象都可以舒緩一下。(外國貨都係去online shop搵)

(4) 初起咳嗽感冒－感冒浴油 (6個月以上適用)

注意發緊燒唔可以用哦～初起傷風感冒俾BB浸浴，含百里香精油所以超級香～有助通鼻塞。德國出品所以唔易買，但好多online shop都有！

(5) 初起咳嗽感冒－傷風感冒天然舒緩藥物 (4個月以上適用)

呢隻雪梨媽媽大愛！美國牌子(購自iherb)，好多次初起傷風感冒都鎮得住，甜甜地言妹妹從來唔會抗拒食，成分相對天然。

(6) 止咳化痰－猴棗散／猴棗末 (一般3個月以上適用)

中藥成分，猴棗末成分靚D，所以價錢都貴一截。

腸胃不適，睡眠質素不佳

(7) 肚風／肚痾－吳德物次，俗稱肥仔水 (初生可用)

長輩可能都識，歷史悠久，問番阿媽原來我同老公細個都飲過。原來春田花花幼稚園都係用佢嘅諧音做校訓！哈哈～

(網上圖片)

通常言妹妹肚仔唔舒服就會俾，相當見效。一般藥房有售。

(8) 腸胃不適、無胃口、經常乍醒－開奶茶/七星茶 (6個月以上適用)

中藥成分，主要係改善腸胃，寧神定驚，我當係BB涼茶。性質溫和，可以幫BB舒服D/訓好D。(有排言妹妹成日半夜喊醒話驚驚，好在有七星茶！)

皮膚篇

大部分初生BB皮膚唔太好，一係胎毒(在母體吸收的多餘營養)，一係未適應母胎外的刺激物，好多父母就會擔心係咪濕疹！初生皮膚幼嫩，要好好護理，做好保濕，加強皮膚屏障。以下兩樣言妹妹都用得好好：

(9) 皮膚紅、甩皮、生粒粒－ AI Cream (初生可用)

揸面比較好(質地厚)，好乾/身體紅時可以用喺身。

(10) 皮膚乾燥 ─ 嬰兒潤膚浸浴油 (初生可用)

一般來說，初生都建議浸浴，BB會安全感大點。而浴油一般比淋浴乳更保濕，所以到冬天言妹妹一有乾紋就轉用浴油。

戶外活動篇

(11) 防熱痱－液體爽身粉 (初生可用)

好多人都會用爽身粉吸汗防止BB生熱痱，但近年有研究指爽身粉的粉末會從鼻孔進入BB的氣管，影響呼吸道健康… 用呢隻液體爽身粉就唔怕啦！

(12) 防曬－ BB防曬乳 (初生可用)

BB皮膚幼嫩，所以出外時記得做足防曬！呢支我喺日本旅行時在BB用品的Supermarket西松屋買的~ 幾好用又唔貴。

(13) 防蚊－蚊扣、蚊貼、草本防蚊潤膚膏 (初生可用)

小朋友俾蚊咬，可大可小。言妹妹就試過手仔俾蚊針，繼而細菌感染，拳頭腫到成個波咁，最後要食抗生素… 之後我就唔敢忽視防蚊！蚊扣可以扣喺衫或BB車，蚊貼可以貼喺衫（言妹妹好鐘意），呢隻草本蚊膏可以平日當面霜用，味道聞落好舒服～

【Suetlei Mama . 雪梨媽媽】

全職工作 . 偶爾要出差 . Part-time讀書 . 80後媽媽一名

大學主修傳理，畢業後跑到慈善機構工作，生活工作兩忙，但發現原來離不開文字。自籌備婚禮開始寫Blog，內容由結婚到新婚生活、陀B、湊B、帶B旅行、育兒心得等。

【生活哲學】

生活再忙，都想記下孩子的成長點滴。

荷包再緊，都想買盡最抵最好的東西(主要)俾囡囡。

更多雪梨媽媽的Blog：http://bit.ly/2uSfb2z