廣告話「養一個小朋友要400萬」， 此刻深感，要養出一個言行有禮嘅小朋友，比揾400萬更難。

孩子轉眼就會行會走學講說話，父母才踏入真正的育兒起步點。 你突然發現，他不再隨你擺佈，開始表達自己思想喜好。遇着一日到黑跟你唱反調，做父母低點EQ，就容易衝口而出一些「育兒NG對白」- 無建設性甚至負面的說話。

麻媽今次就輯錄以下最常聽見的幾句，有幾多已經向你屋企出現？

1. 「NO!  」

發音簡單響亮，加上部份家庭喜用英文溝通，所以由小朋友伸手攞水杯到公園裏想衝向滑梯，出現次數一定係No. 1。

初用都能短暫嚇止有疑問行為，但小朋友好快就「左耳入右耳出」。到進入獨立自主的年紀 (18-24個月，俗稱Trouble 2)，就換成他們事事學你講 - NO! 到時後悔莫及！

2. 「唔好。。。」

唔講NO，好多父母變為開口就「唔好xxx」。麻媽聽過最經典莫過於：

在公園 - 唔好跑 (公園都唔跑得咁幾時跑？)

在店舖 - 唔好掂 (但父母邊講邊一直掂)

在餐廳 - 唔好郁 (唔郁咁點食飯？我諗佢想表達坐定定)

你越心急想制止孩子， 就越容易山出現「越叫唔好越要做」的對抗行為。 其實可以嘗試跳過有問題行為，改為直接講出祈望孩子做到/應該做嘅行為，更清晰易明。

3. 「你再唔聽話我就。。。」

有因必有果本來正常不過，但如只為求恐嚇孩子，每樣事都用同一個後果 - 「你再唔聽話我就叫警察叔叔嚟捉你」，或者係永遠唔會發生嘅後果 -「你再唔聽話我就唔要你」講得多就如「狼來了」的故事，孩子只當笑話聽完就算。

因果要有效，必須以清晰原因配合相關後果。例如moOmoO唔乖乖食飯，麻媽又知道佢鍾意食生果，我會話「如果你無食完飯，就無飯後水果。」並言出必行。

4. 「你睇xxx幾乖？唔似得你」

最怕到長輩家時，就聽到「你睇moOmoO食飯幾乖，唔似得你，成日含住啖飯唔吞。唉！」雖然間接讚緊自己女兒，但那邊廂親戚孩子卻被打擊，麻媽內心也不安樂。

這一代多明白孩子是獨立個體，不應該比較。但現實知易行難，不少父母遇上自己難以控制的事情，尤其是食量胃口，身高體重等，也會心生比較。唯有提醒自己，孩子自有成長的節奏，健康快樂就夠。

希望藉此給新手媽咪引以為鑑，別再重蹈我們的覆轍！

【MOoMOo麻媽】

80後金牛座媽媽，育有一名z世代金牛座女兒。二人性格同樣愛吃愛玩，但亦相當固執。

麻媽率性勇敢，女鵝細膩樂天。每天於美食、教養及搗蛋中徘徊，希望透過文字跟同路的你互相鼓勵，啟發養育正能量。

Facebook Page - https://www.facebook.com/mrsandmissyMOoMoO/

更多MOoMOo麻媽的Blog：http://bit.ly/2v3KAyr