由陀妹妹開始，已經費盡心思幫言妹妹適應做家姐 — 共讀繪本、帶佢一齊做產檢、俾佢摸下肚裡面嘅BB、同朋友嘅BB玩，基本上我諗到嘅方法都盡量做。懷孕後期，言妹妹都似乎好期待，成日話要餵妹妹飲奶食餅幫手換片...

真相係，妹妹出世頭四個月，我覺得處理言妹妹嘅情緒比無得瞓照顧初生更更更費力！

生BB當晚我半夜入院，所以先帶言妹妹到嫲嫲家安頓，言爸爸就陪我入院。因為很少在其他地方過夜，又沒有父母在身邊，大概有點嚇親。妹妹出世後，住院幾天家人都有帶她來醫院見我，但到我出院回家，言妹妹好語重心長咁同我講：媽媽，妳喺醫院我好擔心妳。

由獨生女變家姐

我自己都有妹妹，記得細個都會討厭佢蝦佢。再想，其實幾個月對言妹妹來說很短暫，可以做都做左，唯有等。更何況，由家庭中唯一嘅掌上明珠變了要承擔「家姐」責任嘅小人兒，係扭轉過去三年「獨生女」身分呢...

在瞳妹妹3個多月大，我同言爸爸言妹妹三人到日本參加我好姊妹婚禮。旅行早於陀瞳妹妹前安排妹，而我地覺得3個月大嘅BB不太適合去旅行；另外就想讓言妹妹獨佔我地，彌補一下瞳妹妹出世以來內心嘅缺口。 

最終我地去左個超開心嘅旅行，回程時我地同言妹妹講，因為妹妹嘅犧牲，佢先可以有一個咁開心嘅旅程。從此，兩姊妹嘅相處起左微妙嘅變化，相信佢都妹掛住妹妹，然後見到佢一舉一動係真心想錫妹妹！

依家瞳妹妹7個多月大喇～ 兩姊妹簡直係糖痴豆！

每次我地氹妹妹笑，佢對家姐嘅反應永遠係最大～ 

可能我地習慣所有野有「即食」嘅解決方法，但喺言妹妹適應做家姐一事，提醒我孩子成長有自己嘅步伐，不用急亦急唔來，喺佢旁邊陪伴就好了。

曾經想將言妹妹嘅網名改為言姐姐，但畢竟自己好唔慣... 而且無論身分同環境點轉變，佢喺我心目中都永遠係被寵愛嘅「言妹妹」！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Suetleimama . 雪梨媽媽

居於香港，偶爾要出差，育有兩名可愛囡囡的Working mom。作為雙職媽媽，生活工作兩忙，但大概傳理人離不開文字，心思思想用文字記下自己由籌備婚禮、成為Mrs.S、再成為兩女之母的點滴。

Facebook Page - https://www.facebook.com/suetleimama/

Email: suetleimama@gmail.com

更多雪梨媽媽的Blog：http://bit.ly/2uSfb2z