早幾日有朋友的妻子剛驗孕知道有咗，朋友半夜三間打俾我，問我應該下一步應該做啲咩先？點樣搵醫院，點樣安排產檢，私家醫院定政府醫院好？平時老定的朋友，突然變成徬徨的小孩。

根據我這個生了兩胎，有三個小孩的生B達人經驗，如果經濟許可的話，絕對是醫院政府同私家婦科產檢同時登記安排。

政府醫院的好處是，除了價錢十分經濟外，亦可以保存妳的醫療紀錄。如果懷孕中期有不舒服的情況要入院，也有你的紀錄可以即時找到。而如果你打算在政府醫院生產，也可以有優先權; 如果從來沒有在政府登記產檢，政府有權不接受生產的排期預約。

另外，如果懷孕時出現異常狀況，或需要緊急處理情況，一般建議政府醫院的設備可以較齊全，亦不需要額外龐大的費用。

而私家婦產科醫生體檢的最大好處是，可以每次都用超聲波見到BB，由最初只係一粒豆咁細，到慢慢成形，聽到佢心跳，見到佢手仔腳仔郁下郁下，呢樣野係每個月見婦科醫生最期待嘅事。

懷孕十個月，每個月最期待就係見婦科醫生，透過超聲波可以同BB見下面。政府醫院除了照結構那一次之外，好少會再做超聲波，除非有問題。
例如我懷第二胎時，阿妹唔夠阿哥爭營養，越來越追唔上生長線。所以當時每次見醫生都要照超聲波觀察情況。所以政府醫院就算有得照超聲波，都未必係好事。

另外亦要考慮會唔會想喺私家醫院生BB，如果想係私家醫院生，最好搵返個醫院嘅掛單醫生，或駐院醫生產檢，第時生BB嘅時候就方便好多。

所以知道有咗，第一件事，一定是抽時間去排期。無論係政府，或私家，都唔係即時book即時有得睇，好多都要等兩三個星期，所以一知道就最好即刻book, 其他嘢反而可以慢慢再諗。