言妹妹喜歡自己食飯,而且越來越叻,有時出街食飯隔離枱都會專登行過黎讚佢,作為媽媽一直引以為傲!
當然,成功背後係經歷過好長時間嘅苦功... 採用嬰兒主導戒奶法Baby-led weaning(BLW) 嘅言妹妹自6m開始加入固體食物,由一開始食到成枱成地成身都係,到歲半時(18m)基本上每餐都係自己食。
傳統一般建議約6m/BB坐得穩陣開始加固,由果蓉(purée)、糊仔、再到粥仔、爛飯循序漸進。
近年英國開始提倡由嬰兒主導引進固體食物而戒奶。懷孕時,我就開始睇BLW嘅資料,其實同傳統加固最大嘅分別就係「同時學咀嚼和吞嚥」vs 傳統「先學吞嚥後學咀嚼」。因為糊仔等流質食物不用咀嚼,對一直只飲奶嘅BB會較容易掌握,亦唔擔心啃親。
而BLW則主張BB不用經食糊仔階段,可直接食finger food。一般建議由較淋嘅蔬果開始,例如蒸南瓜、蒸節瓜、香蕉、啤梨,只要BB坐得穩,就算未出牙都可以試。只要將食物切成手指左右尺寸,BB自己用手拎黎食,同時訓練小肌肉,而且直接食會好味D!(無味嘅米糊奶糊真係好難食....),所以BLW被認為比較符合嬰兒整體發展而越來越流行!不過如果想用BLW,媽媽同照顧者一定要知道如果啃親要點應對!最基本就係用手掌托將BB心口,BB面部傾前,輕拍BB背部將食物吐出,而且要學分啃親(gagging)同埋嗆親(choking)嘅分別。
言妹妹好鐘意食蕉蕉~到8個月就已經自己食哂一隻去皮雞翼!
言妹妹算是半BLW BB,喺環境許可下我地都會俾佢試下,但出街食飯、去朋友屋企,有時我就會轉返spoon-fed(因為實在太污糟),或者食即食裝「啜啜」果蓉。
相對傳統加固,BLW有以下幾個好處:
(1) 食野同時學習 — 因為自己用手探索食物,認識唔同形狀同質感,訓練手部小肌肉
(2) 提升BB對進食的興趣
(3) 預備食物相對簡單,BB食唔哂大人都可食番/用黎煮餸
(4) 培養BB自己進食的意識,唔洗追住餵飯
到大少少言妹妹就鐘意食麵包、通粉,可以用固體食物當一餐
【Suetlei Mama . 雪梨媽媽】
全職工作 . 偶爾要出差 . Part-time讀書 . 80後媽媽一名
大學主修傳理,畢業後跑到慈善機構工作,生活工作兩忙,但發現原來離不開文字。自籌備婚禮開始寫Blog,內容由結婚到新婚生活、陀B、湊B、帶B旅行、育兒心得等。
【生活哲學】
生活再忙,都想記下孩子的成長點滴。
荷包再緊,都想買盡最抵最好的東西(主要)俾囡囡。
Facebook Page - https://www.facebook.com/suetleimama/
婚禮籌備 · 陀B湊B - http://wow.esdlife.com/suetlei
旅遊Blogs - http://hutchgoer.com/author/suetlei
Contact: suetleimama@gmail.com
更多雪梨媽媽的Blog:http://bit.ly/2uSfb2z