有時喺講座講開一啲嬰幼兒照顧嘅冷知識，會攞到唔同人客嘅反應。例如有時當問到，「BB其實使唔使飲水呢？」

好多時就算係新手爸媽，都會識答：「其實BB淨係飲奶就夠啦，唔使飲水㗎。」

不過，如果係兩母女嚟聽講座，或者奶奶同新抱嚟，答案就可能未必一樣。

當我解釋「BB 0-6個月其實都唔使飲水」嘅時候，準媽媽就會同媽媽/奶奶細細聲講：「嗱，係唔係呀？營養師都話BB唔使飲水㗎！」

點知喺呢個時候，準婆婆/嫲嫲有機會會突然好大反應，然後大聲反駁：「咩啫！飲啖水之嘛，有幾大問題啫？你細個嗰陣時咪又係咁俾你飲？唔好話飲水，細個驚你唔夠營養，仲會開埋葡萄糖水俾你飲啦！」

係，以前老一輩，成日怕阿B唔夠水、人奶怕佢唔夠飽、奶粉怕熱氣、天氣熱流汗、天氣凍又怕皮膚乾燥...... 於是呢，好多時習慣飲完奶俾BB飲多兩啖水「浪」吓個口，覺得飲少少水健康啲。

其實，世衛都建議頭6個月BB「純」母乳餵哺*。「純」母乳嘅意思，係指無其他食物同飲料，包括埋水（不過如有需要可添加維他命或礦物質補充劑）。

初生BB唔適合飲水，一方面飲水會影響佢地正常飲奶量同時間表，而且BB嘅腎臟好細，未發育健全，飲水有機會影響BB嘅腎功能，甚至水中毒**。

一個家庭迎接一個初生B，全家上下都一定緊張期待，但好多時大家可能都會有自己湊B嘅一套。有時過份緊張，有時危機意識不足，但有更多時候可能唔夠與時並進。所以迎接一個新嘅家庭成員，最好大家都花少少時間去增值一下，學習番一啲最科學、最安全嘅湊B方法，成個家庭先可以真係開開心心迎接小生命嚟臨。

*http://apps.who.int/gb/archive/pdf_files/WHA55/ea5515.pdf?ua=1

**Am J Dis Child. 1991 Sep;145(9):985-90.

Annie Lee－香港營養師學會 (HKNS) 認可營養師 

家有三寶, 一囡和一對龍鳳胎

任職營養師主管多年, 生Bsss後轉為私人執業營養師. 

身兼多職, 撰寫多個健康專欄, 舉辦健康講座, 為人客提供飲食營養建議,喜歡分享貼地的母嬰和育兒的經驗及營養資訊.

Facebook Page: https://www.facebook.com/AnnieLeeDiet/

更多營養師 Annie Lee的Blog：http://bit.ly/2v3H7zR