前排新年假期，再加上流感停課，言妹妹足足放咗一個月假。放假當然要四圍去玩，我地去左一個本地農場真係好值得推介，一家出動推住BB車都絕對無問題！

位於粉嶺坪輋嘅「有心機有機農場」，佔地25萬平方尺，大部分範圍都係石屎路唔會好難行，農場亦有適合小朋友嘅活動可供參與。

一去到首先坐低聽莊主介紹個農場，原來農場嘅農作物有唔少係歐洲品種，定期供應高級餐廳同酒店包括四季酒店，真係一個五星級農場！然後我地就去參與自製Pizza工作坊，工作坊要預先book因為要預留材料。我同言妹妹首先將麵團壓成薄薄的pizza底，然後塗上蕃茄醬，再將配料同芝士鋪上面。

整好個Pizza，就乖乖排隊入爐，農場主人話用荔枝木燒嘅pizza，份外好味！

計我話，自己整嘅Pizza一定好味，言妹妹食得好開心～ 我地仲order左隻田園燒雞，配以農場嘅蔬菜，真係好好味，我無諗過農場嘅食物都可以咁高質！(我地一定好肚餓... 完全唔記得影相...)

食飽飽之後就開始重點活動 — 摘士多啤梨、甜椒、拔蘿蔔、紅菜頭！言妹妹第二次摘士多啤梨，今次好熟練拎住小鉸剪自己操刀。因為要行落士多啤梨田，我轉用孭帶埋瞳妹妹跟住言妹妹同言爸爸，田間嘅路都算好行，唔會太辛苦。

摘完士多啤梨，瞳妹妹要換片，所以返返去講briefing嘅地方，跟手餵埋奶，之後言妹妹就摘左個燈籠椒返黎～ 因為天氣好好所以言妹妹曬到面仔都紅晒，我地就坐低抖左一陣。

晏少少我哋就去拔蘿蔔同埋紅菜頭，農場種左三款蘿蔔，有最常見嘅橙色，另外仲有黃色同紫色。職員幫我地將蘿蔔附近嘅泥土稍稍撥開，然後就可以扯住啲葉將整個蘿蔔拔出黎。我覺得呢個活動最開心係我，因為細細個睇卡通片，成日見到人拔蘿蔔，今次自己終於試到！

完成摘菜活動，我地就喺農場四圍行逛，見到好多好靚嘅農作物，而且仲有隻大肥豬同埋有羊咩咩添～

不得不提就係整個農場環境好靚，係歐陸風格，而且非常乾淨(包括洗手間)，所以真係好適合帶小朋友黎呀！

自行駕車 — 農場設有少量泊車位

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Suetleimama . 雪梨媽媽

居於香港，偶爾要出差，育有兩名可愛囡囡的Working mom。作為雙職媽媽，生活工作兩忙，但大概傳理人離不開文字，心思思想用文字記下自己由籌備婚禮、成為Mrs.S、再成為兩女之母的點滴。

Facebook Page - https://www.facebook.com/suetleimama/

Email: suetleimama@gmail.com

更多雪梨媽媽的Blog：http://bit.ly/2uSfb2z