網上有很多媽媽為BB預備適合BLW嘅食物超有心機，賣相靚又健康，所以覺得我這佛系BLW媽也不用再分享了... 不過有次喺專頁share瞳妹妹個為食樣，有讀者提議我分享一下加固心得，突然都覺得可以由一個繁忙媽媽嘅角度介紹點預備簡單BLW food～
想多了解BLW可重溫舊文：
《自己飯飯自己食！》https://daydaycook.com/daydaycook/hk/website/theme/details.do?id=178935
我幫瞳妹妹引進加固食物的步驟大概是這樣的：
水果(7m)—>蔬菜(7-8m)—>澱粉質(8m)—>蛋白質(9-10m)
【水果篇】
當瞳妹妹可以自己坐穩(7m左右)，我就由水果開始嘗試BLW。起初一日一餐嘅水果只係兩餐奶之間嘅下午茶，所以就算佢食嘅量不多都無所謂... 當佢開始純粹用手將食物擺入口，就會越食越多！
一開始可試淋嘅水果：香蕉、熟到好淋嘅啤梨、桃
注意：蘋果因為易咬斷，唔太適合初期BLW；橘類、士多啤梨雖然淋，但敏感風險比較高，建議起碼10-12m先試
【蔬菜篇】
在正餐時間可以試俾蔬菜，最開心就係一齊開餐唔洗餵！如果煲湯，可以將部分湯料切開少少分開蒸（我會煲飯時擺面蒸淋），又或者焗蕃薯(擺入焗爐半個鐘就得)，熟左再去皮切條。BB熟習後可以試下菜心瓣（我一般都係預先切好放飯面蒸淋）。
煲湯時我常用紅蘿白、南瓜、紅菜頭等湯料，就唔洗額外買其他菜俾BB。
【澱粉質】
到瞳妹妹掌握水果蔬菜都唔錯，就慢慢加入澱粉質增加飽肚感，幫助正式用固體食物取代一餐奶。因為想佢自己拎，我通常會煮幼兒烏冬、麵條、意粉、特別形狀嘅Pasta等等，原則係無納、易淋、幼細易消化。
【蛋白質】
大概到9-10m就再加入蛋類同肉類。其實加固初期已經可以試蛋黃，但對BLW黎講淨食蛋黃好容易散開，所以到9m可以試埋蛋白時(主要是怕蛋白敏感），我會烚蛋然後切片。（因為我個暖奶器有烚蛋模式所以超方便！）
假日有多時間預備的話就可以整肉，我通常用雪藏嘅無激素雞翼/雞搥，解凍後先用果蓉醃幾個鐘甚至半日，除左可去除雪味，亦可令肉質更淋更易咬。
